ओपनर उस्मान ख्वाजाको शतकप्रेरित अस्ट्रेलियाले बिहीबार पाकिस्तानविरुद्धको पहिलो टेस्ट बराबरीमा टुंग्यायो

0

अबुधाबी – ओपनर उस्मान ख्वाजाको शतकप्रेरित अस्ट्रेलियाले बिहीबार पाकिस्तानविरुद्धको पहिलो टेस्ट बराबरीमा टुंग्याएको छ।

१३६–३ बाट पाँचाैं तथा अन्तिम दिनको खेल सुरु गरेको अस्ट्रेलियाले ८ विकेट गुमाउँदै दोस्रो इनिङमा ३ सय ६२ रनमा दिनको खेल समाप्त भएपछि पहिलो टेस्ट बराबरीमा सकिएको हो । अस्ट्रेलियाले जितका लागि ४ सय ६२ रनको लक्ष्य पाएको थियो । अन्तिम दिन कप्तान टिम पायने अविजित ६१ र नाथन लियोन अविजित ५ रनमा खेलिरहेका थिए । १ सय ९४ बलको सामना गरेका पायनेले ५ चौका प्रहार गरे।

ख्वाजाले चौथो विकेटका लागि तार्भिस हेडसँग ८३ रनको साझेदारी गर्दै अस्ट्रेलियाको इनिङ उकासेका थिए । ३ सय २ बल खेलेका ख्वाजाले ११ चौकाको मद्दतमा १ सय ४१ रन बनाउँदा १ सय ७५ बलको सामना गरेका हेडले ५ चौका मद्दतमा ७२ रन जोडे।

दोसो इनिङमा पाकिस्तानमा स्पिनर यासिर शाहले ४ र मोहम्मद अब्बासले ३ विकेट लिए । १ विकेट मोहम्मद हाफिजको नाममा रह्यो।

यसअघि ओपनर मोहम्मद हाफिजले आफ्नो पुनरागमन सुखद पार्ने क्रममा शतक प्रहार गरेपछि पहिलो इनिङमा ४ सय ८२ रन जोडेको पाकिस्तानले १८१–६ मा दोस्रो इनिङ समाप्तिको घोषणा गर्दै अस्ट्रेलियालाई जितका लागि ४ सय ६२ रनको लक्ष्य दिएको थियो । अस्ट्रेलिया पहिलो इनिङमा २ सय २ रनमा सीमित हुँदै २ सय ८० रनले पछि परेको थियो।

Share.

About Author

Leave A Reply